ඇන්තූරියම් ඒකකය ඇන්තූරියම් අංශය ජාතික උද්භිද උද්‍යාන දෙපාර්තමේන්තුවේ තවත් වටිනා අංශයකි. මෙම ඒකකය ඇන්තූරියම් සඳහා සංචිතයක් ලෙස ක්‍රියා කරන අතර දේශීය සහ විදේශීය යන දෙඅංශයේම ප්‍රභේද පවතින තත්වයන් යටතේ මෙහි වර්ධනය කරයි. ගුණාත්මක රෝපණ භාවිත හේතුවෙන් මෙම ශාකවල වසර පුරාම මල් පිපේ. මෙම අංශය 1960 ගණන්වල අගභාගයේ / 1970 ගණන්වල මුල් භාගයේදී ආරම්භ කරන ලද අතර ජර්මානු රජයේ ව්‍යාපෘතියක් යටතේ හවායි රාජ්‍යයෙන් සහ ග්වාතමාලාවෙන් ආනයනය කරන ලද ප්‍රභේද සහිතව සංවර්ධනය කරන ලදී. මේ වන විට, නව වාරිමාර්ග සහ පොහොර පද්ධති ඇතුළු සියලු අවශ්‍ය පහසුකම් සහිතව විශාල වශයෙන් වෙනස් කර ඇත. මෙම ඒකකයෙහි කැපූ මල් ඇන්තූරියම් ප්‍රභේද සහ පත්‍ර ඇන්තූරියම් සඳහා විශාල දැල් නිවාස දෙකක් ඇත. ඇන්තූරියම් පැළ, බීජ පැළ සහ ඇන්තූරියම් පැළවල විවිධ අවධීන් හුරු කරවීම, අතරමැදි ප්‍රමාණයේ දැල් ගෘහ (net houses) දෙකක නඩත්තු කෙරේ. නව ඇන්තූරියම් ශාක ප්‍රභේද මෙම ඒකකයේ අභිජනනය කරන අතර සාමාන්‍ය ජනතාවට මෙන්ම වගාකරුවන්ටද එම පැළ විකුණනු ලැබේ.